«Зияткерлік ойындар – дүниетаным баспалдағы»

“С.Мұқанов атындағы №40 жалпы білім беретін мектеп” коммуналдық мемлекеттік мекемесі

(спорттық іс-шара туралы мәлімет)

Күні: 14.04.2026ж Білім беру ұйымында оқушылардың зияткерлік қабілеттерін дамыту, логикалық ойлауын жетілдіру және инклюзивті мәдениетті қалыптастыру мақсатында «Зияткерлік ойындар – дүниетаным баспалдағы» атты спорттық іс-шара ұйымдастырылды. Аталған шара аясында шахмат, шашка және тоғызқұмалақ ойындары қамтылды.

Іс-шараның басты мақсаты – ерекше білім беруді қажет ететін балалар мен жалпы білім беретін сынып оқушылары арасында достық қарым-қатынас орнату, өзара қолдау көрсету, тең мүмкіндіктер ортасын қалыптастыру болып табылады. Сонымен қатар, оқушылардың ойлау қабілетін дамыту, шыдамдылыққа, тапқырлыққа және стратегиялық жоспар құруға баулу көзделді.

Жарысқа әртүрлі жастағы оқушылар қатысты. Әр ойын бойынша қатысушылар өз шеберліктерін көрсетіп, тартысты ойын өрнегін көрсетті. Шахмат ойынында оқушылар логикалық ойлау мен бірнеше қадам алға жоспарлау қабілеттерін байқатты. Шашкада жылдамдық пен дәлдік маңызды рөл атқарса, тоғызқұмалақта ұлттық құндылықтар мен терең ойлау ерекшеліктері көрініс тапты.

Іс-шара барысында ерекше білім беруді қажет ететін оқушылар да белсенді қатысып, өз мүмкіндіктерін көрсете білді. Бұл олардың қоғамға бейімделуіне, өз-өзіне деген сенімін арттыруға және ортаға еркін араласуына оң әсерін тигізді. Қатысушылар арасында өзара сыйластық, қолдау және түсіністік атмосферасы қалыптасты.

Шара соңында жеңімпаздар мен белсенді қатысушылар дипломдармен және алғыс хаттармен марапатталды. Бұл іс-шара оқушылардың зияткерлік дамуына ғана емес, сондай-ақ инклюзивті мәдениетті нығайтуға үлкен үлес қосты.

Қорытындылай келе, «Зияткерлік ойындар – дүниетаным баспалдағы» атты іс-шара білім алушылардың ой-өрісін кеңейтіп, бірлік пен достықты дәріптейтін маңызды тәрбиелік мәні бар шара ретінде жоғары деңгейде өтті.

Арнайы педагог: А.Артыкбаева